Loke a sali den publisidat di Irene van Grieken



Den shou di Dia di Tata
Irene van Grieken den one-man-show hiláriko
Publiká den La Prensa 22-6-2009

Willemstad – Un sala yen yen na Because Entertainment Center por a gosa di un shou ‘Tata meresé muchu mas atenshon’ relashoná ku Dia di Tata ku e dos gran artistanan Irene van Grieken di Kòrsou i Vale Croes di Aruba.

Irene van Grieken, konosí pa su 40 añanan komo artista den vários komedia di kua su papel komo Beberin ta  unu ku niun  hende no por lubidá i su ‘one-woman-show' Muhé di Poder, a presentá e biaha aki den un ‘one-man-show’ titulá: 'Tokante di tata'.
Den 'Tokante di Tata' Irene van Grieken a subi podio bistí den su flus blanku blanku komo un hòmber machu, ku a kria su famia di un manera ehemplar. Na reakshon di e públiko por komprondé ki impakto positivo e one-man-show di e gran artista Irene van Grieken tabatin.

Riba e pregunta na Irene kon e ta hasi despues di 40 aña pa subi podio duna un shou tras di otro sin kansa, el a bisa ku e ta prepará su mes bon i mas prinsipal ainda ta e públiko ta dun’é e alimento pa por hasi su presentashonnan.
Por haña mas informashon di Irene van Grieken riba www.muhedipoder.com.

Riba e potrèt por mira:
- momentu di presentashon di Irene van Grieken djasabra último i
- Irene van Grieken huntu ku Vale Croes.



Komunikado  pa  Prensa
Di Francis Mathilda
9 di yuni 2009
BAN DUNA MAS ATENSHON NA E FIGURA DI  TATA, “ TATA MERESE  MUCHU  MAS ”, DIASABRA 20 DI YUNI DEN BECAUSE  ENTERTAINMENT CENTER,  VALE CROES  FOR DI ARUBA .
Den un One Men show uniko i audaz “ Beberin “ Irene van Grieken,

Willemstad , - den un show uniko atrobe e  komiko number unu di Aruba i Antiyas lo bin deleita tur presente  bispu di dia di Tata.
E organisashon “ Ban yuda nos muchanan pa un mihor futuro ” huntu ku grupo” Apetit pa Goza “ta korda riba e figura di  Tata ku masha poko biaha ta risibi atenshon manera sa ta e kaso esun di Mama.
Den kuadro aki pa rekauda fondo,nos ta bai pone enfasis pa tur hende korda ku tin e  figura di Tata  ku  ta masha importante pa e Union familiar.
Diasabra dia 20 Yuni e dos organisashonnan  aki ta bai presenta un  tremendo anochi pa o hari i  lubida kosnan menos bon  i  baha un  poko  stress, ku e komiko for di  Aruba Vale Croes i pa prome biaha den un One men show “ Beberin “ ku no mester di introdukshon, Beberin lo trese e lokual e  hombernan falta pa nan ta Tata di berdat,hahahahahaa.!!!
Esaki ta un anochi ku hopi sorpresa i premio pa Tata, den Because su sala grandi i bo ta yuda ku  un bon kausa,pa nos muchanan di  menos rekurso.
Karchi pa e evento aki  ta na benta na; Retaurant Lam Yuen na Salinja , Beep Beep Rio Canario, Mengsing Caminada , Tik Tak den Punda, Shopping Mall Colon su Paga Fasil , i Koko Loko na Banda Bao ,pa esnan ku ta biba na Banda Bao of por yama telf: 666-0695 of  563-4040 pa entrega di 2 of mas karchi.
E organisashon nan aki ta hasi un yamada na komersiante nan ku por yuda pa asi kompra di  karchi nan pa e show aki pa asina nos por sigi yuda nos hobennan di e komunidad aki, yama e numbernan ariba menshona.  
 Nos ta warda bo Diasabra 20 di  Yuni den  Because Entertainment Center. 

Kòrsou, 24 di yüni 2008

Otro tremendo presentashon di Irene van Grieken
Ku’ Muhé di Poder’
Emití pa BISInc

Willemstad – Den Teatro Luna Blou tabatin djadumingu último otro presentashon fenomenal di e one-woman-show ‘Muhé di Poder’ di e artista yu di Kòrsou Irene van Grieken. Un sala yen a gosa di e presentashon i siguiendo reakshonnan ku tabatin despues por a komprondé ku un biaha mas Irene van Grieken a demostrá ki gran artista e ta. Por haña mas informashon riba presentashon di Irene van Grieken riba www.muhedipoder.com òf pa un presentashon por tuma kontakto na telefon 767-9255, e-mail info@muhedipoder.com.

Riba e potrètnan por mira
- públiko gosando djadumingu último di Muhé di Poder i
- Irene van Grieken i su tim di Muhé di Poder
                                                                                                                                            
Kòrsou, 16 di yüni 2008

‘Muhé di Poder’ ketu bai halando atenshon
Emití pa BISInc

Willemstad – Djaweps último tabatin un grupo di bishitante di Teatro Luna Blou kendenan a sali ku masha alegria for di e teatro despues di a mira presentashon di Irene van Grieken den ‘Muhé di Poder’.
Ta trata aki di e one-woman-show di Irene van Grieken ku e artista a skibi inspirá pa bida di su mama defuntu Cicilia Jansen-van Grieken.

‘Muhé di Poder’ tabata un di e presentashonnan importante den e promé Festival Femenino ku Teatro Luna Blou tabatin siman pasa.
Intenshon ta pa tur aña bolbe bini ku e Festival Femenino dediká na artistanan hende muhé. Por bisa ku e aktuashon siman pasa di Irene van Grieken a dal masha duru mes ku e konsekuensia ku Teatro Luna Blou ta ofresé esnan ku no a mir’é ainda oportunidat pa wak e djadumingu próksimo dia 22 di yüni 2008, pa 3’or atardi.

Pa mas informashon por bai riba www.muhedipoder.com òf por yama na 767-9255.

Riba e potrètnan por mira:
1. Irene van Grieken despues di su presentashon a risibí un bukèt di flor di teatro Luna Blou for di man di Marloes van Rooijen;
2. Di robes pa drechi despues di e show di  ‘Muhé di Poder’:  produktor i direktor Reyna Joe, Esther Mayer, Mayra Wong, Irene van Grieken i asistente di produkshon Gricelda Mateo Medina.

Kòrsou, 20 di mei 2008

Hopi goso ku one-woman-show di Irene van Grieken
Durante di ‘high tea’. di FATUM
Emití pa BISInc

Willemstad – FOVAS (Fatum Ontspanningsvereniging Ambiente Sigurá) a selebrá djadumingu último tur mama empleado ku un 'high tea' masha elegante na Patio Rincon Kubano na Muizenberg. Tabata un bon okashon pa  empleadonan femenino di e empresa gosa nan mes un ratu den un ambiente chic i ku atenshon pa tur detaye.
Programa di e ‘high tea’ di FATUM a enserá diferente presentashon ku komo atrakshon spesial 'Muhé di Poder' e 'one-woman-show' di Irene van Grieken.
E artista di hopi trayektorio Irene van Grieken a duna un presentashon tremendo poniendo ku tur esnan presente tabata bou di harimentu.

Presidente di FOVAS Mytzi Martina a ekspresá su satisfakshon pa e atardi i pa e echo ku tur dama di FATUM a selebrá elegantisimo huntu.
Di e forma aki tambe FOVAS a organisá otro aktividat ku bon ambiente pa sigui kumpli ku meta di empleadonan di FATUM.

Riba e potrètnan por mira:
-    Direktiva di FOVAS huntu ku ‘Muhé di Poder’ Irene van Grieken.
-    Ambiente durante di e ‘Muhé di Poder’

Kòrsou, 13 di mei 2008

One-woman-show di Irene van Grieken
'Muhé di Poder' a zona bon den Rincon
Emití pa BISInc

Kòrsou/Boneiru – Un Cactus Fence Country Club na Rincon Boneiru, yen yen a gosa un mundu djadumingu último ora ku Irene van Grieken a presentá su one-woman-show ‘Muhé di Poder’. E presentashon tabata pa selebrá Dia di Mama na un manera úniko. Esnan ku tabata presente a gosa mirando e reakshonnan durante di presentashon di ‘Muhé di Poder’.
Ita Mercera ku ta gerente di  Cactus Fence Country Club a ekspresá su satisfakshon ku tabata posibel pa a hasi e presentashon na Boneiru. Pa sra. Mercera e presentashon aki tabata e mihó manera ku por a selebrá tur mama e aña aki.
‘Muhé di Poder’ ta e promé one-woman-show di e artista yu di Kòrsou Irene van Grieken kende den su karera artístiko pa mas ku 40 aña a aktua den diferente obra den Antia, na Aruba i na Ulanda. ‘Muhé di Poder’, ta un obra inspirá pa bida di su Mama Cicilia Jansen van Grieken, kende manera hopi hende muhé tabata un muhé ehemplar, balente i ku poder. Mester bisa ku ‘Muhé di Poder’ ta un obra ku ta sigui demostrá kuantu mas e artista Irene van Grieken tin aden. E one-woman-show ‘Muhé di Poder’ ta produsí pa Reyna Joe i direktor di zonidu ta Jason Rafaël.
Riba e potrètnan por mira momentunan durante di selebrashon di dia di Mama na Cactus Fence Country Club na Rincon Boneiru ku Irene van Grieken.

Kralendijk, 17 di aprel 2008

Dia di Mama 2008 na Boneiru
Irene van Grieken den one-woman-show “Muhé di Poder”
Emití pa BISInc

Willemstad – Pueblo di Boneiru por a gosa Dia di Mama 2008 ku e gran artista yu di Kòrsou Irene van Grieken den su 'one-woman-show' “Muhé di Poder”.
Promotor Ita Mercera ta organisá e aktividat espesial aki dunando asina oportunidat pa tur hende trit mamanan na Boneiru pa nan por pasa nan dia na un forma alegre, relahá i diferente.

E artista Irene van Grieken ta bon konosí den último 40 aña pa su aktuashonnan den diferente obra na Kòrsou. El a haña masha bon akohida pa su papel típiko di e limpiadó di ofisina Beberin den obranan polítiko di e konosido Eligio Melfor. Tabata na mart 2007 ku el a estrená na Kòrsou su promé ‘one-woman-show’.
Irene van Grieken den “Muhé di Poder” ta ilustrá kon un hende muhé su bida ta desaroyá ku tur reto, alegria, tristesa, logro i sorpresa posibel. E mes a skibi e obra “Muhé di Poder” ku ta inspirá pa bida di su mama sra. Cicilia Jansen van Grieken kende a muri resientemente na edat di 94 aña. Desaparishon resientemente di su mama, kende tabata su inspirashon di bida, a pone ku Irene van Grieken a hasi un adaptashon na e obra, loke a hasié muchu mas intensivo i impaktante.
“Mi mama no tei mas pero e mensahe ku el a laga pa tur hende muhé ta ku den kada un di nos tin un poder i ku tur hende muhé ta un hende muhé di poder. I ta esei mi por presentá tambe den mi obra, ku ta dediká na tur hende muhé i ku ta pa tur hende muhé’, asina e artista Irene van Grieken a deklará.

Tabatin bastante éksito kaba ku “Muhé di Poder” na Kòrsou i ketu bai tin hopi pedido pa mas presentashon di Irene van Grieken den su 'one-woman-show'. Produkshon di “Muhé di Poder” ta den man di Reyna Joe i zonidu ta na enkargo di Jason Rafaël.

Boneiru ku presentashon di “Muhé di Poder” ta selebrá tur hende muhé i sigur e hende muhé ku ta mama, ku of sin doló, lagando tur hende ku presentá e ‘one-woman-show’ gosa den un bon ambiente, kontentu i relahante, kitando prekupashonnan di tur dia miéntras ku por gosa un di e artistanan femenino di mas talentoso ku Antia a konosé.
“Muhé di Poder” na Boneiru ta 5’or atardi djadumingu 11 di mei 2008 den Cactus Fence Country Club, (Kurá di Yatu) na Kaminda Washington na Rincon, Boneiru.

Ta haña karchi na Boneiru serka sra. Ita Mercera na 568-9613 òf na e-mail: valerieanthony@hotmail.com.

Notabel ta e rubrika semanal ku Reyna Joe ta skibi for di yuli 2004 riba djaluna den korant La Prensa.

Di 148 Notabel djaluna 7 di mei 2007

Irene van Grieken
Bida diario ta trese asina tantu kos kuné ku semper tin espasio pa hende hari nan barika yen kitando asina tur loke ta trata na hasi bida pisá. Netamente esei ta tambe e intenshon den fin di siman aki kaminda Irene van Grieken ta bai presentá su promé One-Woman-Show: ‘Muhé di Poder’. Un obra inspirá pa bida di su mama Cecilia ‘Chichi’ Jansen van Grieken.
Awor: ora nos papia di Irene van Grieken nos ta papia di un outoridat teatral. Un artista di bèrdat ku durante di último 40 aña a yena kurason di masha hopi hende ku alegria ku su presentashonnan. Su fama mas grandi el a traha hungando e figura di Beberin den produkshonnan di otro grandi den mundu di teatro, esta Eligio Melfor. I te awe hopi hende ta referí n’e komo Beberin, maske ku el a hunga masha masha hopi otro papel.

Skibiendo su promé One-Woman-Show Irene van Grieken a trese un dimenshon nobo den su bida artístiko. Ku ‘Muhé di Poder’ e ta ilustrá kon tur muhé ta pasa den mesun eksperensianan di tristesa, alegria, reto, kurashi i prinsipalmente kon sobreviví, pasando kada unu na su manera dor di kosnan diario di bida. E forsa di Irene van Grieken ta den kon e ta kue un suseso di den kas ku tur hende por rekonosé i lagabu mira e ridikules, prèt, chiste, chansa i sin mas ko’i hari den susesonan normal den bida di tur hende.
Kombersando ku Irene van Grieken por nota kon yen e ta di asina tantu informashon i eksperensia di su mes i di hendenan yegá di dje i ku ta indiká ku ta muchu mas show lo por saka for di e gran artista aki.
I ta esaki nos mester; no únikamente di Irene van Grieken, pero tambe di otro gran artistanan ku nos tin riba nos isla. Nos ta konsiente ku tin diferente aspekto ku por ta opstákulo pero ku e guia i kontaktonan korekto lo por saka muchu mas di hopi artista di kalidat internashonal ku ta bibando i trahando riba nos isla.

Loke ta importante tambe pa nos artistanan i kisas otronan ku no a subi tarima nunka ta  pa nan skibi, ke men dokumentá informashonnan i eksperensianan ku nan tin. Den ‘Muhé di Poder’ nos ta haña chèns di pasa den shen aña di historia di nos isla i rekonosé asina loke ta i tabata nos debilidat i tambe kiko ta i tabata nos forsa. I nos por realisá ku tin kos ku nos mester traha ariba i ku tin kos ku nos mester konservá. Nos balornan, nos metanan. Mester dokumentá tur tur informashon, mas tantu posibel pasobra ta di e forma ei so nos por elevá nos mes i sòru pa nos yunan, nan yunan i yunan di eseinan tambe por benefisiá di loke nos sa awe.
‘Muhé di poder’ ta un obra úniko ku tur hende ku gusta un bon ratu pa relahá pero na mes momentu tambe gosa di bida, mester a wak.

I komo ku djadumingu awor ta bai duna atenshon na e hende muhé poderoso ku a duna bida, nos mama, ta bon pa regalá mamanan (tantu esnan di doló i esnan sin doló) un karchi pa nan bai hari un poko eventonan ku ta keda presentá i ku sigur sigur nan tambe por relatá n’e, pasobra nan por rekonosé komo algu ku nan tambe a pasa den bida. ‘E obra aki ta algu pa ilustrá un pal’i muhé’, asina Irene van Grieken mes ta bisa. I intenshon ta pa tur, pero tur pal’i muhé, bin gosa kon nan mes ta.

‘Muhé di Poder’, e promé One-Woman-Show di Irene van Grieken ta di 11 pa 14 di mei 2007 riba Pool Terrace di Plaza Hotel Curaçao. Bo no por pèrd’é! Bon siman.

Por komuniká ku Reyna Joe na info@notabel.com
                                                                                                                                          
Korsou, 4 di mart 2007

Irene van Grieken a superá su mes
den tremendo one-woman-show ‘Muhé di poder’
Emití pa BISInc

Willemstad – Loke Irene van Grieken a hasi djasabra último den su One-Woman Show' titulá ‘Muhé di Poder’, ta algu ku a demostrá ku e ta un artista ku muchu mas aden ku kisas e mes por a imagin'é.
Esnan presente den e sala di Holiday Beach Hotel tabata haña nan ta hari sin fin durante di e  show di un ora i diesinku minüt, kaminda nan a haña un kátedra teatral, duná pa Irene van Grieken. E artista a ilustrá enérgikamente diferente fase ku un hende muhé ta pasa aden durante di shen aña di bida. Kon e hende muhé por sufri, gosa, kobardiá, inspirá, pari i selebrá pero mas ainda para fuerte den tur situashon komo pal’i muhé.
‘Muhé di Poder’ ta skibí pa Irene van Grieken i ta inspirá pa bida di su mama Cicilia ‘Chichi’ Jansen van Grieken ku tin aktualmente 93 aña di bida. Pa Irene su mama ta un  muhé ehemplar, balente i ku poder i modelo di e hende muhé fuerte ku tin den kada hende muhé riba nos isla. E obra ta produsí i dirigí pa Reyna Joe.

Ku ‘Muhé di Poder’ a selebrá djasabra último hende muhé den kuadro di Dia Internashonal di Hende Muhé 2007, na final di e di 4 konferensha anual di hende muhé ku a tuma lugá na Kòrsou i ku ta titulá "About Women and Power".
E one-woman-show aki tabata un obra ku segun intenshon mester a tuma lugá e biaha aki so. Pero konsiderando e tantísimo reakshonnan, pa bin ku algun presentashonnan mas, lo bai analisá posibilidat pa Irene van Grieken bolbe presentá su tremendo one-woman-show: ‘Muhé di Poder’.

Riba e potrètnan por mira momentunan durante di e one-woman-show di Irene van Grieken ‘Muhé di Poder’.

Kòrsou, 22 di febrüari 2006

Irene van Grieken den one-woman-show “Muhé di Poder”
despues di konferensha ‘About Women and Power’
Emití pa BISInc

Willemstad –“Muhé di Poder” ta titulo di e one-woman-show di e gran artista yu di Kòrsou Irene van Grieken, ku ta estrená dia 3 di mart próksimo na final di e di 4 konferensha anual di hende muhé na Kòrsou “About Women and Power”.
“Muhé di Poder” ta e forma úniko pa selebrá hende muhé relashoná ku Dia Internashonal di Hende Muhé 2007.

Irene van Grieken den “Muhé di Poder” ta ilustrá kon un hende muhé su bida ta desaroyá ku tur reto, logro i sorpresa posibel. Ta di promé biaha ku Irene van Grieken ta trese un obra den kua e so ta presentá.  E mes a skibi e obra “Muhé di Poder” ku ta inspirá pa bida di su mes mama sra. Cicilia Jansen van Grieken.
Produkshon di “Muhé di Poder” ta den man di Reyna Joe kende tambe ta organisá e di 4  konferensha anual pa hende muhé na Kòrsou, ku ta e aña aki “About Women and Power”.

Ku “Muhé di Poder” ta selebrá hende muhé den un bon ambiente, dunando chèns na tur ku presensiá e obra aki e oportunidat, di pasa un ratu kontentu i relahante kitando prekupashonnan di tur dia, miéntras ku por gosa un di nos artistanan femenino di mas talentoso.
“Muhé di Poder” ta 20.00’or, djasabra 3 di mart 2007 den sala di konferensha di Holiday Beach Hotel & Casino, entrada ta f. 26,25. Pa partisipante na e konferensha “About Women and Power” ta grátis.